ନାଲକୋ ପକ୍ଷରୁ ଅଖିଳ ଭାରତୀୟ ଗ୍ରାହକ ସମ୍ମିଳନୀ ୨୦୨୫ ଆୟୋଜିତ

ଭୁବନେଶ୍ଵ, (12/03) ସ୍ୱତନ୍ତ୍ରବାର୍ତ୍ତା ବ୍ୟୁରୋ : ଭାରତ ସରକାରଙ୍କ ଖଣି ମନ୍ତ୍ରଣାଳୟ ଅଧିନସ୍ଥ ନବରତ୍ନ ଉଦ୍ୟୋଗ ନ୍ୟାସନାଲ ଆଲୁମିନିୟମ କମ୍ପାନୀ ଲିମିଟେଡ(ନାଲକୋ) ପକ୍ଷରୁ ଆଜି ଭୁବନେଶ୍ଵର ଠାରେ "ଟ୍ରାନ୍ସଫର୍ମିଙ୍ଗ ଆଲୁମିନିୟମ ଟୁଗେଦର - ଟୁଡେ, ଟୁମରୋ ଆଣ୍ଡ ବିୟଣ୍ଡ" ବିଷୟବସ୍ତୁ ଆଧାରିତ "ଅଖିଳ ଭାରତୀୟ ଗ୍ରାହକ ସମ୍ମିଳନୀ ୨୦୨୫" ଆୟୋଜିତ ହୋଇଯାଇଛି । ଏହି ଅବସରରେ ନାଲକୋ ସିଏମଡି ଶ୍ରୀ ବ୍ରିଜେନ୍ଦ୍ର ପ୍ରତାପ ସିଂହ ମୁଖ୍ୟ ଅତିଥି ଭାବେ ଯୋଗ ଦେଇଥିବା ବେଳେ ନିର୍ଦ୍ଦେଶକ (ବାଣିଜ୍ୟିକ) ଶ୍ରୀ ସଦାଶିବ ସାମନ୍ତରାୟ, ଏବଂ ନିର୍ଦ୍ଦେଶକ (ଉତ୍ପାଦନ) ଶ୍ରୀ ପଙ୍କଜ କୁମାର ଶର୍ମା ଉପସ୍ଥିତ ରହିଥିଲେ। ପୂର୍ବତଟ ରେଳପଥର ପ୍ରିନ୍ସିପାଲ ଚିଫ୍ କମର୍ଶିଆଲ ମ୍ୟାନେଜର ଶ୍ରୀ ସଞ୍ଜୟ କୁମାର ମିଶ୍ର (ଆଇଆରଟିଏସ) କାର୍ଯ୍ୟକ୍ରମରେ ସମ୍ମାନିତ ଅତିଥି ଭାବେ ଯୋଗ ଦେଇଥିଲେ।ନିଜ ଅଭିଭାଷଣରେ ନାଲକୋ ସିଏମଡି ଶ୍ରୀ ବ୍ରିଜେନ୍ଦ୍ର ପ୍ରତାପ ସିଂହ "ବିକଶିତ ଭାରତ ୨୦୪୭" ସ୍ୱପ୍ନକୁ ସାକାର କରିବା ଦିଗରେ ଆଲୁମିନିୟମ ଧାତୁର ଗୁରୁତ୍ୱ ଉପରେ ଆଲୋକପାତ କରିଥିଲେ। ସେ ନାଲକୋର ସମସ୍ତ ବ୍ୟବସାୟିକ କାର୍ଯ୍ୟଶୈଳୀରେ ଗୁଣବତ୍ତା, ତ୍ୱରିତତା ଏବଂ କାର୍ଯ୍ୟରେ ସ୍ୱଚ୍ଛତା ସୁନିଶ୍ଚିତ କରିବା ପାଇଁ କମ୍ପାନୀ ପ୍ରତିବଦ୍ଧ ବୋଲି କହିଥିଲେ। ବ୍ୟବସାୟିକ ସମ୍ପର୍କକୁ ଆହୁରି ସୁଦୃଢ଼ ​​କରିବା ପାଇଁ ସେ ଅଂଶଗ୍ରହଣକାରୀମାନଙ୍କୁ ସେମାନଙ୍କର ଉତ୍ପାଦ ସମ୍ବନ୍ଧୀୟ ଆବଶ୍ୟକତା ନିମନ୍ତେ ଯୋଗାଯୋଗ, ପରାମର୍ଶ ଓ ନିରନ୍ତର ମତ ବିନିମୟ ଉପରେ ଗୁରୁତ୍ତ୍ଵାରୋପ କରିଥିଲେ। କମ୍ପାନୀର ଘରୋଇ ଏବଂ ଅନ୍ତର୍ଜାତୀୟ ଗ୍ରାହକଙ୍କ ଉତ୍ପାଦ ସମ୍ବନ୍ଧୀୟ ଆବଶ୍ୟକତା ଓ ସହଯୋଗ, ପାରସ୍ପରିକ ଆଲୋଚନା ଓ ମୂଲ୍ୟବାନ ମତାମତ ଆଧାରରେ ଆଲୁମିନା-ଆଲୁମିନିୟମର ବ୍ୟବସାୟିକ ଦୃଶ୍ୟପଟକୁ ଏକ ନୂତନ ରୂପ ଦେବା ଉଦ୍ଦେଶ୍ୟରେ ଏହି କାର୍ଯ୍ୟକ୍ରମର ଆୟୋଜନ କରଯାଇଥିଲା। ଏହି ଅବସରରେ ସିଆରୟୁ ଇଣ୍ଟରନ୍ୟାସନାଲ୍ ସହଯୋଗରେ "ଆଲୁମିନିୟମ୍ ଇଣ୍ଡଷ୍ଟ୍ରୀ ଆଉଟଲୁକ୍" ବିଷୟ ଉପରେ ଏକ ବିଶ୍ଳେଷଣାତ୍ମକ ଅଧିବେଶନର ମଧ୍ୟ ଆୟୋଜନ କରାଯାଇଥିଲା। କାର୍ଯ୍ୟକ୍ରମକୁ ସ୍ମରଣୀୟ କରିବା ନିମନ୍ତେ ତଥା କମ୍ପାନୀ ସହ ଦୀର୍ଘ ସମୟ ଧରି ଯୋଡ଼ିହୋଇଥିବା ସହଯୋଗୀମାନଙ୍କୁ ସେମାନଙ୍କର ନିରନ୍ତର ବିଶ୍ୱାସ ଏବଂ ଭରସା ପାଇଁ ସମ୍ମାନିତ କରାଯାଇଥିଲା।